Класс!

Գինու արվեստը

ԻՆՉՊԵՍ ԸՆՏՐԵԼ ԳԻՆՈՒ ԲԱԺԱԿՆԵՐ
Հայտնի է, որ յուրաքանչյուր խմիչք մատուցում են հատուկ բաժակով: Այս հանգամանքը հատկապես կարևոր է գինու պարագայում: Բաժակը պետք է լինի հարթ և թափանցիկ ապակուց: Երիտասարդ գինու համար երկար, եզրերի կողմում «բացվող», լայնացող գավաթներն են: Ավելի հին գինին «պահանջում է» լայն հատակով և նեղացող բերանով գավաթ` գինու բույրը պահպանելու համար: Այն թողնում է, որ գինին շնչի: Գիտակներն այդպես հեշտորեն տեսնում են գինու տարիքը: 

Կարմիր գինի

Կարմիր գինու գավաթը պետք է լինի առնվազն 600 մլ.: Այս տեսակի գինու բաժակները գրեթե չեն նեղանում և չեն կլորանում են եզրին մոտ: Այս ձևը թույլ է տալիս գինուն հոսել ուղիղ լեզվի առջևի և կենտրոնական հատվածների վրա, որոնք զգայուն են հիմնականում քաղցր համերի նկատմամբ, ինչի հետևանքով առաջին կումն անելիս չի զգացվում գինու թթու կամ տտիպ համը, այլ միայն մրգային բույրը:

Հնացրած կարմիր գինին մատուցվում է այնպիսի գավաթով, որի պատերը գնալով նեղանում են: Բացատրությունը հետևյալն է` հնացրած գինու նուրբ բույրը կարող է փչանալ օդի հետ մեծ շփման հետևանքով, իսկ քաղցր գինու համն ավելի հավասարակշռված կթվա, եթե նեղ եզրի շնորհիվ հոսի դեպի լեզվի քաղցրի հանդեպ քիչ զգայուն հետնամասը:




Սպիտակ գինի

Սպիտակ գինու բաժակները պետք է լինեն ավելի փոքր մինչև 340 մլ.: Այս գինիները խորհուրդ է տրվում ըմպել դասական բաժակով: Սա պայմանավորված է նրանով, որ սպիտակ գինին ընդունված է ավելի սառը ըմպել, քան կարմիրը: Այսպիսով՝ գավաթը, փոքր չափսի շնորհիվ, արագ է դատարկվում և գինին չի հասցնում տաքանալ:









||


Շամպայն գինի

Գազավորված գինու բաժակն ավելի երկար է, իսկ գազավորված քաղցր գինին
լավ բացվում է լայն գավաթի մեջ: Մասնագետները խորհուրդ են տալիս խաղացող գինիները լցնել նեղ ու երկար գավաթների մեջ: Լավ է, երբ եզրերը փոքր ինչ փռված են: Կարևոր է նաև, որպեսզի գավաթի հիմքում հատուկ փոսիկ լինի, որտեղ էլ կհանգրվանեն պղպջակները:












Վարդագույն գինի

Վարդագույն գինու բաժակը լայն է, քան սպիտակ գինունը, եզրերը թեքված են դեպի դուրս:

















ԳԻՆԻ ԸՄՊԵԼՈՒ ԱՐՎԵՍՏԸ

Անտիկ աշխարհում գինին օգտագործում էին ջրի հետ, ինչպես ծարավը հագեցնող միջոց: Ամեն նոր գինի գնահատեք յուրովի` նախ գույնը հետո բույրը, նոր միայն համը: Աշխատեք գինին այնպես լցնել, որ շշի պատերի կամ հատակի նստվածքը չանցնի բաժակի մեջ: Ոսկե կանոնի համաձայն գինին հարկ է լցնել գավաթի մեկ երրորդ չափից քիչ ավելի, որպեսզի այն պտտաձև շարժելու հնարավորություն լինի: Գինին պտտաձև շարժում են, որպեսզի գինու մեջ առկա բուրավետ նյութերը փոխազդեն օդի հետ և ավելի ըմբռնելի դառնան:
Տարեցների համար ամենաօգտակարը հին կարմիր գինին է, քանի որ այն տաքացնում է մարմինը: Միևնույն ժամանակ նրանք պետք է հրաժարվեն սպիտակ գինուց: 
Սպիտակ գինին ավելի շատ համապատասխանում է էներգիայով լեցուն մարդկանց, այն չի առաջացնում գլխացավ:
Քաղցր և թանձր գինին համապատասխանում է այն մարդկանց ովքեր ցանկանում են ուժեղանալ, ամրանալ: 
Ամեն մի ումպ առնելուց լեզվի վրա շոշափեք խմիչքը, զգացեք նրա նրբությունը, փորձեք ընկալել երանգները թույլ արտահայտված վարդահամ, հաճելի մեղրահամ, անկրկնելի թեթև երանգներ և այլն:
Միանգամից պետք չէ խմել գինին: Գինիները մի խմեք չափազանց սառեցված: 




ԻՆՉՊԵՍ ՃԻՇՏ ԵՎ ԳԵՂԵՑԻԿ ՄԱՏՈՒՑԵԼ ԳԻՆԻՆ
Գինին` Ձեր սեղանին
Այս մեկը բոլոր կանոններից երևի թե ամենազվարճալին է, քանի որ խոսքը գնում է գինու և սփռոցի գույների համադրության մասին: Կարմիր, վարդագույն և սպիտակ գինիների տարբեր տեսակներն ունեն իրենց յուրահատուկ երանգները: Սպիտակ գինիներին բնորոշ են կանաչավուն, ոսկեգույն և դեղին երանգները, կարմիրներին` մանուշակագույն, ալ կարմիր և կարմրանարնջագույն: Այս պարագայում կարևորություն է ստանում սփրոցի գույնը` մուգ գույնի սփրոցը թույլ չի տա ճիշտ ընկալել գինու երանգը, փոխարենը արժի ընտրել ճերմակ, վարդագույն կամ դեղնավարդագույն սփռոց:
Գունային համադրության հարցը լուծելուց հետո գինու շիշը պետք է դնել սեղանին: Գինու համար նախատեսված հատուկ զամբյուղների մեջ շիշը կիսաուղղահայաց դիրք է ընդունում և նստվածքը չի խառնվում հեղուկին: Ի դեպ, որպեսզի մինչ խմելու բուն գործընթացին անցնելը նստվածքը հասցնի նստել շշի հատակին, խորհուրդ է տրվում շիշը նախօրոք դնել սեղանին:
Գինին մատուցվում է հատուկ տվյալ տեսակի համար նախատեսված գավաթով: Խորհուրդ չի տրվում տարբեր գինիներ միևնույն գավաթից ըմպել, չէ որ այլ գինու նույնիսկ չնչին զանգվածը, որ մնում է բաժակի պատերին, ընդունակ է փոխել լցվող մեկ այլ գինու համը: Աշխատեք Ձեր ունեցած գինիների տեսակներին համապատասխանող գավաթներ դնել սեղանին`դասավորելով դրանք ըստ բարձրության մեծից փոքր` ձախից աջ, իսկ առաջինը դնել ջրի համար բաժակը:

Ինչպես բացել շիշը
Կարմիր գինին պետք է բացել մատուցելուց մեկ ժամ առաջ, որպեսզի այն «շնչի»: Այս նուրբ գործընթացը որոշակի հմտություններ է պահանջում: Սխալ հեռացնելով խցանի ծածկույթը Դուք կփչացնեք շշի տեսքը, ինչը ցանկալի չէ: Մասնագետը, սովորաբար հատուկ դանակով հեռացնում է խցանի ծածկի վերին մասը`կտրելով այն եզրից մի փոքր ավելի ցածր: Եզրը կարևոր է ազատել թիթեղյա ծածկույթից, քանի որ վերջինս շփվելով գինու հետ ևս կարող է վնասել դրա համին: Երբեմն, հատկապես հնեցված գինիների դեպքում, խցանն ու շշի եզրը կարող են կեղտոտ լինել, այդ դեպքում անհրաժեշտ է սրփել դրանք խոնավ մաքուր կտորով:
Գինու շիշը բացելիս օգտվում են պտուտակավոր բացիչից, որը հնարավորություն է տալիս նրբորեն վարվել շշի հետ և չթափահարել այն ավելորդ անգամ: Բացիչի պտուտակը ոչ մի դեպքում չպիտի դուրս գա խցանի հակառակ կողմից, քանի որ այդպիսով վերջինիս փշուրները կհայտնվեն գինու մեջ և կփչացնեն նրա համը: .
Խցանը զգուշորեն հեռացրեք, իսկ շշի եզրը` սրփեք: Եթե ուզում եք ցնցել Ձեր հյուրերին գինու էտիկետի իմացությամբ, ապա կարող եք դրանից հետո ևս մեկ անգամ խցանի չոր մասով անցկացնել շշի եզրով` կտորե կամ թղթե անձեռոցիկից մնացած մազմզուկները հեռացնելու համար: Վերջում չմոռանաք ուշադիր զննել խցանը` եթե այն պարունակում է բորբոսի հետքեր, ապա գինին չարժի մատուցել հյուրերին:

Ինչպես վարվել շշի հետ
Գինին բաժակների մեջ լցնելիս շիշը պետք է բռնել հիմքից, այնպես, որ պիտակը երևա: Տգեղ է համարվում բռնել շիշը վզիկից, անհեթեթ է նաև մատը տեղադրել շշի հատակին գտնվող փոսիկի մեջ: Բաժակները լցնում են աջից, ոչ ավել քան բաժակի մեկ երրորդի չափով: Շշի և բաժակի եզրերը չպետք է դիպչեն իրար:

Ինչպես վարվել բաժակի հետ
Անհարմար վիճակում չհայտնվելու համար բաժակը պետք է ամուր բռնել: Սակայն գինի ըմպելիս ընդունված չէ գավաթից բռնել, բաժակը սովորաբար բռնում են ոտիկից, երեքից հինգ մատներով` կախված գավաթի չափսից: Երբեմն, չափազանց հովեցրած կարմիր գինիով բաժակը թուլատրելի է պահել ափերի մեջ` գինին տաքացնելու համար, սակայն ապակու վրա մարմնի և ըմպելիքի ջերմաստիճանի տարբերության հետևանքով կարող են հետքեր մնալ:

Սեղանի շուրջ
Գինին հատուկ վերաբերմունք պահանջող ըմպելիք է, թերևս նույնքան, որքան այն անձը, որի հետ որոշել եք կիսել այն: Քանի որ թե առաջինը, և թե երկրորդն արժանի են անհատական ուշադրության, մի խոսեք, եթե լիքը բաժակն արդեն Ձեր ձեռքում է, ընդհատեք զրույցը, կում արեք, և միայն դրանից հետո շարունակեք խոսակցությունը: Եթե հենց այդ պահին Ձեզ հարց է ուղղվում, պետք է դնել բաժակը սեղանին և պատասխանել: Գինին ընդունված է ավելացնել միայն դատարկ բաժակի մեջ: Կիսով չափ դատարկված բաժակի մեջ գինի ավելացնելը հյուրին կարող է հարկադրական թվալ: Իսկ որոշ ժամանակով սեղանի մոտից հեռացած մարդու բաժակն առհասարակ ընդունված չէ լցնել:

Հերթականություն
Դուք լուրջ եք մոտեցել հյուրընկալության համար գինիների ընտրության հարցին և լայն տեսականի պատրաստել: Այդ դեպքում ի նկատի ունեցեք մասնագետների շրջանում ընդունված` գինիները փորձելու հերթականությունը, որը հիմնվսծ է բարդից պարզ սկզբունքի վրա.
Սկզբում մատուցվում է սպիտակ գինին, հետո` կարմիրը
Սկզբում ավելի երիտասարդը, հետո` հնեցվածը
Սկզբում անապակը, հետո` քաղցրը
Սկզբում թույլը, հետո` թնդեցվածը

Ֆրանսիացիներն ասում են, որ սպիտակ գինիները ստեղծված են ծարավը հագեցնելու համար, կարմիրները` հաճույքի, իսկ վարդագույնները` սիրո: Թող այս խորհուրդները չշեղեն Ձեզ գինի խմելու և մտերիմների հետ ընթրելու հաճույքից, այլ էլ ավելի գեղեցկացնեն շփումը գինու հետ:



ԻՆՉՊԵՍ ՊԱՀԵԼ ԳԻՆԻՆ ԲԱՑՎԱԾ ՇՇՈՒՄ

Որպես կանոն, գինով շիշը բացելուց հետո երեկոյի ընթացքում խմվում է մինչև վերջ: Սակայն երբեմն բացված շիշը մնում է կիսատ: Կարծում եմ շատերին է հայտնի, որ գինին կիսատ չի կարելի պահել, քանի որ այն լինելով կենդանի օրգանիզմ` կարող է ենթարկվել ձևափոխությունների: Փակ շշում գինին կարող է պահվել տարիներ շարունակ եվ համապատասխան պայմանների ապահովման դեպքում այն նույնիսկ բարձրացնում է իր որակը: Սակայն շիշը բացելու պահից ստեղծվում է խիստ վտանգ գինու որակական հատկությունների վատացման եվ փչացման համար:
Գինու գլխավոր թշնամին թթվածինն է, որը թափանցելով գինու մեջ սկսում է վնասել նրան: Թնդեցրած եվ հատուկ գինիները ավելի երկար կարող են դիմակայել թթվածնի կործանիչ ազդեցությանը կախված իրենց բաղադրությունից եվ հատկապես էթիլ ալկոհոլի բարձր պարունակությունից: Սակայն հանգիստ եվ ածխաթթու գազով հագեցած եվ գերհագեցած գինիները կարող են որակազրկվել նույնիսկ մեկ գիշերվա ընթացքում:
Հարկ է նշել, որ որքան շատ է գինու թթվածնի հետ շփման մակերեսը,այնքան արագ այն կենթարկվի անցանկալի փոփոխությունների, օրինակ, կիսով չափ դատարկ շշում գինին ավելի շուտ կփչանա, քան շշում, որից ընդամենը մեկ բաժակ են ըմպել: 
Թթվածնի շփումը գինու հետ պակասացնելու ամենապարզ միջոցներից մեկը շշում մնացած գինին ավելի փոքր տարայի մեջ լցնելն է: Կարելի է դանդաղացնել գինու որակազրկումը ամուր փակելով իր իսկ խցանով եվ տեղադրելով այն հով ու մութ տեղում, օրինակ՝ սառնարանում:
“Խաղուն” գինին առանց շատ ամուր խցանի կդառնա ոչ պիտանի արդեն մի քանի ժամ հետո: Լավ ամուր խցանի առկայության դեպքում այն կպահպանի իր հատկությունները առավելագույնը մեկ օր:
Սպիտակ եվ վարդագույն թեթեվ գինիները շիշը բացելուց հետո կարելի է պահել 1-3 օր: Նրանց թարմ մրգային բույրը սկսում է անհետանալ խցանը հանելուց հետո շատ կարճ ժամանակահատվածում:
Կարմիր անապակ գինիները՝ 1-ից 5 օր: Առաջին երկու օրվա ընթացքում կարմիր գինու շիշը կարելի է պահել սենյակային ջերմաստիճանի ներքո, սակայն հետո այն անհրաժեշտ է տեղափոխել սառնարան: Սկզբում թթվածինը նպաստում է այս գինիների բույրի բացահայտմանը, համի փափկեցմանը, սակայն մեկ կամ երկու օր անց սկսվում է նրա կործանարար աշխատանքը:
Թնդեցրած, քաղցր եվ հատուկ գինիները կարող են պահվել ավելի երկար:


Ինչ չի կարելի անել

Ոչ մի դեպքում չի կարելի տարբեր գինիների մնացորդները լցնել մեկ շշի մեջ, եթե իհարկե նպատակ չի հետապնդվում քացախ պատրաստել:
Որոշ ռեստորաններում հաճախ կարելի է պատվիրել մեկ կամ երկու գավաթ գինի: Նման տեղերում առկա են հատուկ սարքավորումներ որոնց օգնությամբ բացված շշի մեջ լցնում են իներտ գազ, որը դուրս է մղում թթվածինը, կամ օգտվում են հատուկ վակումային խցաններից, որոնց օգնությամբ շշից հեռացվում է թթվածինը: Այդ միջոցառումները երկարացնում են գինու կյանքի տևողությունը, սակայն ամեն դեպքում, լավ կլինի օգտագործել գինին հնարավորինս արագ: Եթե դա դժվար է անել, ապա հրավիրեք ընկերներին կամ գործածեք այն նրբահամ որևէ ուտեստ պատրաստելու համար:


Իսկ ֆրանսիացիներն ասում են, որ եթե գինին չեք ըմպել առաջին իսկ օրը, ապա չարժեր նույնիսկ բացել այն:

Created By